Ochiq kirishMaqola
M. N Abdurazzokova, N.M.Kurbanov · Research Focus International Scientific Journal · 2024
Ushbu maqolada butun dunyoda tabiiy, ekologik toza oziq-ovqat mahsulotlari yetishmasligi mavzusi ko‘tarilgan bo‘lib, u zamonamizning eng dolzarb muammolaridan biri hisoblanadi; xususan, aholining iste‘mol madaniyati oshishi natijasida tabiiy va shifobaxsh oziq-ovqat mahsulotlariga talab ortmoqda, shu jumladan asal va asal mahsulotlariga bo‘lgan talab ham o‘smoqda. Respublikamizda yetishtirilayotgan asalari oilalarini mavsumlararo davrda tabiiy, vitamin va minerallarga boy ozuqa bilan ta‘minlash maqsadida tadqiqot ob‘ekti sifatida shirin oq jo‘xori tanlandi, chunki respublikamizda shirin oq jo‘xori o‘simligi xonakilashtirilgan, shuningdek yetishtirish uchun yetarli xomashyo bazasi va sharoitlar mavjud. Maqolada shuningdek qayta ishlangan shirin oq jo‘xori poyasi sharbatini kimyoviy tahlil qilish usullari va natijalari keltirilgan. Shirin oq jo‘xori poyasi sharbati tarkibidagi vitaminlar, mineral moddalar, uglevodlar, og‘ir metallar, aminokislotalar va oqsillar miqdori aniqlangan hamda olingan natijalar bo‘yicha asalari oilalari uchun ozuqa yaratishga mo‘ljallangan foydali xususiyatlar haqida ma‘lumotlar keltirilgan. Shirin oq jo‘xori o‘simligini o‘rganish asosida poya sharbati uglevodlar, vitaminlar, makro- va mikroelementlarga boy ekanligi, o‘simlikning o‘zi esa qurg‘oqchil va sho‘rlangan iqlim sharoitlarida ham kutilgan hosil berishi aniqlangan. Asalari oilalarini kuzgi va erta bahorgi oylarda quyultirilgan shirin oq jo‘xori sharbati qo‘shib tayyorlangan ozuqa bilan boqishda nojo‘ya ta‘sirlar kuzatilmadi va ozuqa asalarilar tomonidan yaxshi o‘zlashtirildi.