Ochiq kirishMaqola
Юсупова Наргиза Абдикодировна, Орипов Фирдавс Суръатович, Бабаханова Фаризахон Шехрозовна · Research Focus International Scientific Journal · 2023
So‘nggi yillarda bir qator mamlakatlarda oshqozonning turli kasalliklari, jumladan, oshqozon va o‘n ikki barmoqli ichak yara kasalligi, gastroezofageal reflyuks, atrofik gastrit va oshqozonning boshqa kasalliklari skriningida invaziv endoskopiya usuli samaraliroq va yengilroq noinvaziv usullar bilan almashtirilmoqda. Shu sababli bir qator tadqiqotlar o‘tkazildi [2, 3, 4]. Ushbu tadqiqotlar natijasida qon zardobidagi pepsinogen I (PGI), pepsinogen II (PGII) miqdorining o‘zgarishi ushbu kasalliklarning biologik markeri sifatida qo‘llanilishi mumkinligi, ularning qon zardobidagi konsentratsiyasi esa oshqozon devorining morfofunksional holatini belgilashi, keyinchalik o‘zgarishlar aniqlanganda esa tashxis gistologik tekshiruv usuli bilan tasdiqlanishi aniqlandi [1]. Pepsinogenlar pepsinning nofaol oqsil-o‘tmishdoshlari bo‘lib, ular oshqozonda xlorid kislota ishtirokida katalitik faol pepsinga aylanadi. Sog‘lom odamlarda PGI me‘yorda PGII ga nisbatan uch baravar ko‘p ishlab chiqariladi. Ma‘lumki, oshqozon shilliq qavati, shikastlanish mexanizmidan qat‘i nazar, regeneratsiyalanish va o‘zining dastlabki tuzilishini tiklash qobiliyatiga ega. Shu bilan birga, oshqozon shilliq qavatining progressiv yallig‘lanishida shikastlangan bezlar regeneratsiya qobiliyatini yo‘qotadi, shilliq qavat o‘rnida esa metaplastik epitelial hujayralar paydo bo‘ladi, ular atrofik gastritga olib keladi [5].