Ochiq kirishMaqola
Бабажанова Ш.Д., Абдурахимова Д.И. · Research Focus International Scientific Journal · 2025
Perinatal asfiksiya butun dunyoda va mamlakatimizda jiddiy perinatal kasallanish va o‘limga sabab bo‘luvchi muhim muammo bo‘lib qolmoqda. Hozirgi vaqtda KTG (kardiotokografiya) tug‘ruq davrida homilani kuzatishning asosiy usuliga aylandi. Intranatal asfiksiya homilaning giperkapniyasi va gipoksemiyasi sifatida ta‘riflanadi, ular respirator va metabolik atsidozga olib keladi. Homilada metabolik atsidozning rivojlanishi tug‘ilgandan so‘ng ko‘p o‘tmay kindik arteriyasidan olingan qonning past pH ko‘rsatkichida aks etadi. Tadqiqot maqsadi homilada metabolik atsidozni aniqlashda KTG ning prognostik ahamiyatini baholash edi. Materiallar va usullar. Tadqiqotga tug‘ruq davrida intranatal KTG usuli bilan kuzatilgan 200 nafar tug‘ayotgan ayol va ularning chaqaloqlari kiritildi, shuningdek bola tug‘ilgandan so‘ng darhol kindik arterial qoni tahlil qilindi. Chaqaloqning kindik qoni tahlili natijalariga ko‘ra bemorlar 2 guruhga bo‘lindi: asosiy guruhni homila/chaqaloqda metabolik atsidoz aniqlangan 62 nafar bemor (kindik arterial qoni pH ≤7.12) tashkil etdi, taqqoslash guruhini esa chaqaloqlarida gipoksiya va metabolik atsidoz belgilari bo‘lmagan 138 nafar bemor tashkil etdi. Natijalar. Patologik KTG turi asosiy guruhda ishonchli tarzda ko‘proq, ya‘ni 36 (58,1%) holatda uchradi, taqqoslash guruhida esa 12 (8,9%) holatda (OR 14.5; CI 95% 6.67-31.64). Patologik KTG ning homilada metabolik atsidozni bashorat qilishdagi sezuvchanligi 75%, o‘ziga xosligi 82,9% ni tashkil etdi (RR 6.7; CI 95% 3.73-11.93). KTG musbat natijasining prognostik qiymati 58,1%, metabolik atsidozni bashorat qilishda manfiy natijaning prognostik qiymati 91,3% ni tashkil etdi. Xulosalar. KTG musbat natijasining homilada metabolik atsidozni bashorat qilishdagi prognostik qiymati yuqori bo‘lmadi va patologik KTG mavjudligi homilada atsidozni faqat 58,1% bemorda bashorat qildi. Patologik KTG manfiy natijasining homilada metabolik atsidozni bashorat qilishdagi prognostik qiymati juda yuqori (91,3%) bo‘ldi, bu esa tug‘ruq davrida patologik KTG turi bo‘lmaganda homila va chaqaloqda atsidoz bo‘lmasligi ehtimoli yuqoriligidan dalolat beradi.